Azərbaycan İlahiyyat İnstitutunda (Aİİ) təhsil ödənişsizdir, tələbələr bütün fənlər üzrə pulsuz dərsliklərlə təmin ediliblər. İnstitutda dünya standartlarına uyğun yüksək təhsilin verilməsi üçün zəruri olan bütün tələblər yerinə yetirilib. Sinif otaqları müasir dövrün tədris metoduna uyğun avadanlıqla təchiz edilib, dərslərdə ənənəvi üsullarla yanaşı, müasir metodlar da tətbiq olunur.
İlahiyyat fakültəsi tədrisə nəzarət etməklə yanaşı, həmçinin tələbələrin asudə vaxtlarında dil üzrə bilik və bacarıqlarının daha da təkmilləşdirilməsi yönündə əhəmiyyətli layihələr həyata keçirməkdə davam edir. Belə ki, 1 oktyabr 2022-ci il tarixindən fəaliyyətə başlayan Ərəb dili və İngilis dili kursları 2023/2024-cü tədris ilində də davam etdirilmişdir. Ərəb dili və İngilis dili kurslarında tələbələrə dil bacarıqlarını inkişaf etdirən, həmin dillərdə danışıqlarını daha da təkmilləşdirmək üçün dərslər tədris olunur.
Bununla yanaşı, İnstitutun IV tədris ili “Dinşünaslıq” və “İslamşünaslıq” ixtisasları üzrə tələbələrin din xadimi vakant yerlərinə müsabiqələrdə uğurlu iştirakı məqsədilə onların biliklərinin, dünyagörüşlərinin artırılması məqsədilə Peşə hazırlığı kursu təşkil edilir. Peşə hazırlığı kursunda Elmihal, Əqaid, Qurani-Kərim qiraəti və təcvidi, Risalə, Dövlət və din, Nəchül-bəlağə, Ərəb dili fənləri tədris olunur. Dərslərin tədrisinə İnstitutun müəllimləri ilə yanaşı, digər qurumlarda çalışan əməkdaşlar da cəlb olunur.